RUAHA CATHOLIC UNIVERSITY

Makala haya yamechunguza suala la ufungwa wa kisaikolojia katika riwaya ya Takadini. Tatizo hasa ni kwamba dhana ya ufungwa ilichunguzwa zaidi na wataalamu waaliotangulia katika mwegamo wa jela. Suala la ufungwa wa kisaikolojia halikushughulikiwa kwa mapana yake. Hata hivyo, makala yamejiegemeza katika mkabala wa kitaamuli. Data zimepatikana kwa njia ya uchambuzi wa matini. Nadharia ya Saikolojia Changanuzi imetumika katika uchambuzi wa data zilizowasilishwa. Matokeo ya uchunguzi huu yameonesha kuwa ufungwa wa kisaikolojia umegawanyika katika makundi makuu mawili. Makundi hayo ni ufungwa wa kisaikolojia wa kijaala na ufungwa wa kisaikolojia usio wa kijaala. Ufungwa wa kisaikolojia wa kijaala ndio ambao umemakinikiwa zaidi katika makala haya. Aina ya pili imedokezwa tu ili kujenga msingi wa hoja. Aidha, matokeo ya uchunguzi yanadhihirisha kuwa kila mwanadamu ni mfungwa kwa kuwa hakuna mwenye uhuru uliokamilika. Hali hii inatokana na kukabiliwa na mamlaka, kanuni, sheria au taratibu zinazompangia mwanadamu asifanye baadhi ya mambo, ambayo anahisi anawiwa kuyafanya. Makala yanahitimisha kuwa kila mtu huangukia katika ufungwa wa aina mbalimbali kwa sababu ya kushindwa kutimiza matamanio ya nafsi yake kwa namna aitakayo. Matokeo yake hujikuta akiangukia katika manung‘uniko, mafumbo na kusema bila kuzingatia taratibu, utamaduni na staha za jamii inayohusika.

Ufungwa wa kisaikolojia, nadharia ya ufungwa, mkondo wa ufungwa na riwaya ya ufungwa