RUAHA CATHOLIC UNIVERSITY

Makala haya yamechunguza nafasi ya fasihi mazingira katika kuelekea uchumi wa viwanda nchini Tanzania. Data za msingi zilipatikana katika jamii kwa kuchunguza nyimbo zinazohusu mazingira. Mbinu ya usomaji makini na upembuzi yakinifu zilitumika kupata data za msingi. Mihimili ya nadharia ya Uhalisia na nadharia ya Ekolojia ndiyo iliyoongoza katika mjadala wa uchanganuzi wa data zilizowasilishwa. Matokeo ya utafiti huu yanaonesha kuwa kuna uhusiano mkubwa kati ya mazingira na uendelezaji wa viwanda. Aidha, nyimbo ni nyenzo muafaka ya kuelimisha jamii kuhusu utunzaji wa mazingira na kudhibiti mienendo na tabia isiyofaa katika jamii. Utunzaji wa mazingira nchini Tanzania inaonekana ni jukumu la asasi zilizopewa dhamana kuhusu mazingira na si jukumu la kila mmoja wetu. Makala haya yanapendekeza kuwa ni vyema uelimishaji wa elimu mazingira ufanyike katika ngazi mbalimbali kuanzia ngazi ya kaya hadi kitaifa ili kumfanya kila mmoja wetu awe sehemu ya utunzaji wa mazingira. Uanzishwaji wa viwanda na ukuaji wa uchumi unatakiwa uende sanjari na uhaishaji wa mazingira.

Mazingira, Fasihi - mazingira, ekolojia, uchumi na uchumi wa viwanda