RUAHA CATHOLIC UNIVERSITY

Matumizi ya TEHAMA katika ufundishaji na ujifunzaji wa lugha yanaendelea kushamiri kote duniani. Ukuaji wa teknolojia unasaidia kurahisisha na kuchagiza uelewa wa wajifunzaji katika stadi mbalimbali za lugha. Makala haya yalilenga kudodosa maoni ya walimu wa Kiswahili kama lugha ya pili wilayani Lushoto, kuhusu mchango wa TEHAMA katika ufundishaji wa stadi ya kusoma kwa Wasambaa wanaojifunza Kiswahili kama lugha ya pili. Data za makala haya zimekusanywa kwa njia ya usahili. Nadharia iliyotumika kuongoza utafiti huu ni modeli ya Ukubalifu wa Teknolojia ya Devis (1989). Watoataarifa waliotumika ni walimu kumi (10) kutoka katika shule tano (5) za msingi wilayani Lushoto mkoani wa Tanga. Mkabala wa kitaamuli umetumika katika uchanganuzi wa data. Matokeo yanaonesha kuwa matumizi ya TEHAMA yamekuwa na mchango mkubwa katika kurahisisha na kuboresha mbinu za kitamaduni za ufundishaji wa stadi ya kusoma na wale wasiotumia TEHAMA wanaona kuwa matumizi ya TEHAMA katika mazingira ya vijijini yana changamoto nyingi za kimazingira, kiujuzi na kiuchumi ambazo hukwamisha mchakato wa ufundishaji na ujifunzaji wa stadi ya kusoma.

Matumizi ya TEHAMA, ufundishaji, stadi ya kusoma