RUAHA CATHOLIC UNIVERSITY

Tamthiliya ya Kiswahili ni miongoni mwa kazi za kisanaa zenye wajibu mkubwa wa kuijenga jamii katika hali mbalimbali kupitia wahusika wake. Kwa kawaida, wahusika hudhibitiwa na kuathiriwa kwa kiasi kikubwa na muktadha wa utunzi, hasa mawazo yanayowahusu waandishi kulingana na falsafa zao, mazingira yao, utamaduni wao, hali ya maisha na harakati zilizopo katika jamii inayohusika. Makala haya yanachunguza muakiso wa uhalisi wa kauli za mhusika mlevi katika kazi za kifasihi. Zaidi pia, kuna urejeleaji watamthiliya teule za Lina Ubani (1984) na Mabepari wa Bongo (2007). Data za msingi za makala haya zimepatikana maktabani kwa kudurusu tamthiliya teule zilizobainishwa. Mapitio ya nyaraka zilizotumika kuthibitisha data za msingi pia zimepatikana kwa mbinu za usomaji wa nyaraka. Uchambuzi na mjadala wa data zilizowasilishwa umeongozwa na nadharia ya Ucheshi. Makala haya yanahitimisha kuwa mhusika mlevi ni mojawapo ya mawakala wa kazi za kifasihi kwa kuwa huyafichua na kuyaweka wazi mambo yote yanayoshindikana kusemwa na wahusika wakiwa katika ung‘amuzi tambuzi.

Muakiso, Mlevi, Mhusika, Ucheshi, Tamthiliya ya Kiswahili